चितवन-
राप्ती नदीको संरक्षण, स्वच्छता तथा जैविक विविधताको प्रवर्द्धन गर्ने उद्देश्यले आगामी मंसिर १ गते ‘चौथो राप्ती नदी दिवस–२०८३’ मनाइने भएको छ।
यस वर्ष दिवसको नारा ‘स्वच्छ राप्ती र आदिवासी पहिचान, वन्यजन्तु र जलचर संरक्षण हाम्रो साझा अभियान’ तय गरिएको छ। दिवसका अवसरमा बिहान ८ बजेदेखि मकवानपुरको भीमफेदीदेखि चितवनको गोलाघाटसम्म राप्ती नदी किनारका विभिन्न स्थानमा एकैसाथ बृहत् सरसफाइ तथा जनचेतनामूलक कार्यक्रम सञ्चालन गरिने आयोजकले जनाएको छ।
राप्ती नदी तटीय क्षेत्र सरसफाइ अभियान, चितवनको संयोजन तथा संरक्षणसम्बद्ध निकाय, स्थानीय तह र विभिन्न संघसंस्थाको समन्वयमा कार्यक्रम आयोजना गर्न लागिएको हो।
मकवानपुरको भीमफेदी क्षेत्रबाट उद्गम भई हेटौंडा, मनहरी र चितवन राष्ट्रिय निकुञ्ज हुँदै पश्चिम चितवनको गोलाघाटमा नारायणी नदीसँग मिसिने राप्ती नदी दुर्लभ घडियाल गोही, ओत, कछुवा, विभिन्न प्रजातिका माछा तथा रैथाने र आगन्तुक चराचुरुङ्गीको महत्वपूर्ण बासस्थान हो। यस नदीको तटीय क्षेत्रमा बसोबास गर्ने आदिवासी समुदायको जीवनशैली, संस्कृति र पहिचानसँग पनि यसको गहिरो सम्बन्ध रहेको छ।
नदीमा बढ्दो मानवीय चाप र प्लास्टिकजन्य फोहोरबाट हुने प्रदूषण न्यूनीकरण गर्दै जलचर तथा वन्यजन्तुको बासस्थान संरक्षण गर्ने उद्देश्यले हरेक वर्ष मंसिर १ गते राप्ती नदी दिवस मनाउँदै आइएको छ।
आयोजकले दिवसका दिन बिहान ८ बजे आफूलाई पायक पर्ने राप्ती नदी किनारको स्थानमा उपस्थित भई सरसफाइ तथा संरक्षण अभियानमा सहभागी हुन स्थानीयवासी, संरक्षणकर्मी, युवा र सम्पूर्ण सरोकारवालालाई आग्रह गरेको छ।
-
१.
-
२.
-
३.
-
४.
-
५.
-
६.
-
७.
-
८.
-
९.
-
१०.