नेपाल र चीनको आपसी सम्बन्ध, मानवीयता झल्काउने सामूहिक गायनसहितको नृत्यमा दुवै देशका विद्यार्थीले आ–आफ्ना भावना आपसी मित्रताको प्रतिकका रूपमा प्रकट गरेका हुन् ।

प्रधानमन्त्री ओलीले दुई देशको सम्बन्धमा सांस्कृतिक पक्ष, कलाका पक्षसँगै एकअर्काका उपलब्धिहरू, परम्पराहरू, संस्कृतिहरू बुझ्ने र तिनलाई एकअर्कामा आदानप्रदान गर्ने अवसर सम्मेलनले दिने बताउनुभयो । उहाँले यस्ता कार्यक्रममा नयाँ पुस्तालाई सहभागी गराउँदै आपसी सम्बन्धलाई अगाडि बढाउन महत्त्वपूर्ण योगदान पु¥याउनुपर्ने सुझाव दिनुभयो ।

नेपालका लागि चीनका राजदूत सोङले विगत दुई वर्षयता नेपालीहरूले चिनियाँ भाषा र संस्कृतिप्रति लगाव बढाएकाले यसलाई आगामी दिनमा पनि निरन्तरता दिनुपर्नेमा जोड दिनुभयो । सम्मेलनमा हालसम्मकै ऐतिहासिक सहभागिता रहेको भन्दै यसले भविष्यका लागि थप मार्गप्रशस्त गर्ने उहाँले बताउनुभयो । उहाँले दुई देशका विद्यार्थीद्वारा गरिएको सांस्कृतिक प्रस्तुतिले आगामी दिनमा दुई देशको सम्बन्ध थप प्रगाढ हुँदै जाने विश्वास व्यक्त गर्नुभयो ।

फिनिक्स नेपालका अध्यक्ष विनोद ब्लोनले नयाँ पुस्तामाझ जोडेर जनसम्बन्ध प्रगाढ बनाउने अभियान आफूले थालेको जानकारी दिनुभयो । सो अवसरमा प्रधानमन्त्री ओलीले युवा सशक्तीकरण पुरस्कारबाट काठमाडौँ महानगरपालिकाका उपप्रमुख सुनिता डङ्गोल, व्यवसाय नेतृत्व पुरस्कारबाट राजेशकाजी श्रेष्ठ र वीरेन्द्रराज पाण्डे तथा शिक्षा उत्कृष्ट पुरस्कारबाट अनुराधा शर्मालाई सम्मानित गर्नुभएको थियो । रासस