काठमाडौं। अर्थमन्त्री जनार्दन शर्माले विकासमैत्री नीतिको अभाव रहेको बताएका छन् ।
आइतवार मन्त्रालयमा अर्थविद्हरू सँगको छलफलमा उनले विकासमैत्री संरचना र विकासमैत्री नीतिको अभाव रहेको बताएका हुन् ।
‘विकासमैत्री संरचना तथा विकासमैत्री नीतिहरूको आज अभाव देखिरहेको छ’, मन्त्री शर्माले भने, ‘यस्ता जटिलताले विकासमा बाधा उत्पन्न गरेका छन् ।’
संविधान बमोजिम मुलुकको स्पष्ट अर्थनीति नहुनुका कारण अहिले अर्थतन्त्रमा विभिन्न समस्या देखा परेको उनको भनाइ छ । उनले सबै समस्याहरूको जड राजनीति भएको बताउँदै राजनीतिक दलहरूमा सहमतिको आवश्यकता औंल्याए ।
राजनैतिक दलहरूमा मुलुकलाई सुहाउँदो स्पष्ट अर्थनीति वा खाका बनाउने बारे सहमति नहुँदा सरकार सँगै नीति परिवर्तन गरिरहनुपर्ने अवस्था रहेको बताए । ‘वास्तवमा अर्थतन्त्रमा देखिएका विभिन्न समस्याहरूको मूल समस्या भनेको राजनीतिक क्षेत्रको समस्या हो’, उनले भने, ‘नेपालको सन्दर्भमा संघीय लोकतान्त्रिक गणतन्त्रको मूल अर्थतनीति यो हो भन्ने कुराको स्पष्ट राजनीतिक खाका आवश्यक छ ।’
छलपलमा मन्त्री शर्माले विज्ञहरूको सुझावलाई सरकारले मार्गदर्शकको रूपमा लिने र छलफललाई निरन्तरता दिने समेत प्रतिवद्धता पनि व्यक्त गरेका थिए ।
छलफलमा विज्ञहरूले तथ्यांकका आधारमा मुलुकको अर्थतन्त्र धरासायी भइनसकेको भन्दै थप खराब अवस्थातिर जान नदिन आवश्यक उपायहरू अवलम्बन गर्न सुझाव दिएका थिए । विदेशी मुद्रा सञ्चितिका लागि भुक्तान सन्तुलन नभएसम्म आयातमा गरिएको कडाइलाई निरन्तरता दिन पनि उनीहरुको सुझाव थियो ।
यस्तै कृषि उत्पादकत्व बढाउने, अनुत्पादक क्षेत्रको कर्जा प्रवाहलाई निरुत्साहन गर्ने, संरचनागत सुधार गर्ने लगायतका सुझाव समेत विज्ञहरूले दिएका छन्।
छलफलमा राष्ट्रिय योजना आयोगका पूर्व उपाध्यक्ष डा शंकर शर्मा, प्राडा विश्वम्भर प्याकुरेल, योजना आयोगका पूर्व उपाध्यक्ष डा मिनबहादुर श्रेष्ठ सहभागी थिए । त्यस्तै भारतका लागि नेपालका पूर्व राजदूत डादुर्गेशमान सिंह, अर्थ विश्लेषक हरि रोका, डा रामकुमार फुयाललगायतको पनि उपस्थिति रहेको थियो ।