कार्यक्रममा चितवन रोटरी क्लबका अध्यक्ष गेहेन्द्रमान श्रेष्ठले सोलार प्रणाली उपभोक्ता समितिलाई हस्तान्तरण गर्नुभयो। कार्यक्रममा निर्वाचित अध्यक्ष राजन पिया, निवर्तमान अध्यक्ष रामचन्द्र अधिकारी, पूर्व अध्यक्षहरू उत्तमलाल चुके, कल्याण जोशी, भानु शर्मा र ज्ञानेन्द्रमान शाक्य तथा सेवा परियोजना चेयर गुनेश्वर महतोलगायतको उपस्थिति थियो।

सोही अवसरमा बाढीका क्रममा १ हजार ६ सय ४३ विद्यार्थीलाई सुरक्षित राख्न महत्वपूर्ण भूमिका निर्वाह गरेको भन्दै त्रिभुवन त्रिशूली माध्यमिक विद्यालयका प्रधानाध्यापक राजेन्द्र दवाडीलाई खेलकुद सामग्रीसमेत हस्तान्तरण गरिएको थियो।

चितवन रोटरी क्लबका पूर्व अध्यक्ष भानु शर्माले सोलार प्रणाली जडानले स्थानीय समुदायमा आशा र उत्साह थपिएको बताउनुभयो। स्थानीयवासीले खानेपानी तथा सिँचाइको समस्या समाधानमा यसबाट महत्वपूर्ण सहयोग पुग्ने अपेक्षा गरेका छन्।

स्थानीय समुदायबाट प्राप्त आवश्यकता र सुझावका आधारमा क्लबले आगामी दिनमा थप सामाजिक तथा पूर्वाधारसम्बन्धी कार्यक्रम सञ्चालन गर्ने जनाएको छ। क्लबका सदस्यहरूले स्थलगत अनुगमन तथा स्थानीयवासीसँग प्रत्यक्ष संवादमार्फत आगामी सेवा परियोजनाका लागि आवश्यकताको पहिचानसमेत थालेका छन्।

बाढी प्रभावित समुदायलाई तत्कालीन राहतसँगै दीर्घकालीन पुनःस्थापना र आवश्यक पूर्वाधार निर्माणमा सहयोग गर्ने उद्देश्यले गरिएको यस पहलबाट खानेपानी, सिँचाइ, स्वास्थ्य र शिक्षा क्षेत्रमा सकारात्मक प्रभाव पर्ने अपेक्षा गरिएको छ।