खेतबारी, चितवन-
स्पाउस क्लब अफ आरसी चितवनको आयोजना र चितवन रोटरी क्लब को सहयोगमा शुक्रबार, २०८३ असोज २३ गते (९ अक्टोबर २०२६) इच्छाकामना गाउँपालिका–७, खेतबारीस्थित श्री राष्ट्रिय आधारभूत विद्यालयमा महिनावारी स्वच्छता तथा सचेतना कार्यक्रम सम्पन्न भएको छ।
महिनावारीसम्बन्धी सही जानकारी प्रदान गर्ने, व्यक्तिगत सरसफाइको महत्व बुझाउने तथा महिनावारीप्रतिको सामाजिक भ्रम र संकोच हटाउने उद्देश्यले कार्यक्रम आयोजना गरिएको हो। कार्यक्रममा कक्षा ७ र ८ मा अध्ययनरत छात्राहरू, विद्यालयका शिक्षिका तथा स्थानीय महिलासहित करिब ६० जनाको सहभागिता रहेको थियो।
स्पाउस क्लब अफ आरसी चितवनकी अध्यक्ष तथा स्टाफ नर्स जानकी तिवारी शर्माले स्रोत व्यक्तिका रूपमा सहजीकरण गर्नुभएको थियो । कार्यक्रममा महिनावारीको प्रक्रिया, महिनावारीका समयमा अपनाउनुपर्ने व्यक्तिगत सरसफाइ, प्याडको सुरक्षित प्रयोग तथा व्यवस्थापन, संक्रमणबाट बच्ने उपाय र महिनावारीका समयमा पोषणयुक्त खानपानको महत्वबारे जानकारी प्रदान गरिएको थियो।
कार्यक्रममा अध्यक्ष जानकी तिवारी शर्माले महिनावारी महिलाको प्राकृतिक जैविक प्रक्रिया भएकाले यसलाई लाज, डर वा भेदभावको विषय बनाउन नहुने बताउनुभयो। उहाँले किशोरीहरूलाई महिनावारीसम्बन्धी समस्याबारे खुलेर प्रश्न गर्न, आवश्यक स्वास्थ्य परामर्श लिन र स्वच्छतामा विशेष ध्यान दिन आग्रह गर्नुभयो। उहाँले महिनावारीसम्बन्धी गलत धारणा हटाउन परिवार, विद्यालय र समुदाय सबैको सकारात्मक भूमिका आवश्यक रहेकोमा जोड दिनुभयो।
कार्यक्रमले किशोरीहरूमा महिनावारीसम्बन्धी वैज्ञानिक जानकारी र स्वच्छताका अभ्यासबारे चेतना अभिवृद्धि गर्नुका साथै यस विषयमा खुलेर छलफल गर्ने वातावरण निर्माण गर्न सहयोग पुर्याएको आयोजकले जनाएको छ।
शिक्षा, स्वास्थ्य तथा सामुदायिक विकासका क्षेत्रमा विभिन्न सामाजिक गतिविधि सञ्चालन गर्दै आएका रोटरी क्लब अफ चितवन र स्पाउस क्लब अफ आरसी चितवनले यस्ता सचेतनामूलक कार्यक्रममार्फत किशोरी तथा महिलाको स्वास्थ्य, आत्मविश्वास र सम्मानजनक जीवनयापनमा योगदान पुर्याउने उद्देश्य राखेका छन्।
महिनावारी स्वच्छतासम्बन्धी सही ज्ञान र व्यवहारको विकासले किशोरीहरूको स्वास्थ्य संरक्षण, विद्यालयमा नियमित उपस्थिति तथा महिनावारीका आधारमा हुने विभेद न्यूनीकरणमा महत्वपूर्ण भूमिका खेल्ने विश्वास आयोजकले व्यक्त गरेका छन्।
-
१.
-
२.
-
३.
-
४.
-
५.
-
६.
-
७.
-
१.
-
२.
-
३.
-
४.
-
५.
-
६.
-
७.
-
८.
-
९.
-
१०.