चितवन-
जापानमा व्यावसायिक सवारी चालकको बढ्दो मागलाई लक्षित गर्दै नेपाली चालकहरूका लागि रोजगारीको नयाँ अवसर अघि सारिएको छ। लाइफलाइन ओभरसिज (CHITWAN) प्रा.लि. र भिक्ट्री निहोन एजुकेशनल कन्सल्टेन्सीले पहिलो चरणमा ८०० जना नेपाली चालकलाई निःशुल्क जापानी भाषा तथा ड्राइभिङ तालिम प्रदान गर्ने तयारी गरेका छन्।
प्रस्तावित कार्यक्रमअन्तर्गत जापानमा ट्रक, बस तथा ट्याक्सी चालकका रूपमा रोजगारीको अवसर उपलब्ध गराउने लक्ष्य राखिएको छ। कम्पनीका अनुसार जापानमा रोजगार सम्झौताअनुसार मासिक २ लाख ५० हजार रुपैयाँभन्दा बढी बराबरको तलब प्राप्त गर्न सकिनेछ। यसका अतिरिक्त बोनस, ओभरटाइम, सामाजिक सुरक्षा तथा अन्य सुविधासमेत उपलब्ध हुन सक्ने जनाइएको छ।
नेपालमा व्यावसायिक सवारी चलाइरहेका चालकसँगै कतार, साउदी अरब, यूएई, कुवेतलगायत खाडी मुलुकमा लामो समयदेखि सवारी चालकका रूपमा कार्यरत अनुभवी नेपालीलाई प्राथमिकता दिइने कम्पनीले जनाएको छ।
कम्पनीका अध्यक्ष सन्देश अर्याल हालै जापानका विभिन्न सहरमा रहेका यातायात कम्पनी तथा स्थानीय, महानगर र प्रिफेक्चर तहका सरकारी प्रतिनिधिहरूसँग भेटघाट गरेर नेपाल फर्किएका छन्। उनका अनुसार जापानी यातायात कम्पनीहरू नेपाली चालकलाई रोजगारी दिन इच्छुक छन् र दक्ष चालकको माग बढ्दो क्रममा छ।
“नेपाली चालकसँग सीप र अनुभव छ। हामी उनीहरूलाई जापानी भाषा र ड्राइभिङ तालिम दिएर जापानमा राम्रो आम्दानी र सुरक्षित भविष्य निर्माण गर्ने अवसर उपलब्ध गराउन चाहन्छौँ,” अर्यालले बताए।
कम्पनीले दिएको जानकारीअनुसार हवाई टिकट तथा जापानी ड्राइभिङ लाइसेन्सको तयारी र प्रक्रियामा लाग्ने खर्चसमेत रोजगारदाता कम्पनीबाट व्यहोर्ने व्यवस्थाका लागि सहकार्य भइरहेको छ। उक्त खर्च करिब ११ लाख रुपैयाँसम्म हुन सक्ने बताइएको छ।
जापानको व्यवस्थित यातायात प्रणाली, आकर्षक पारिश्रमिक र सामाजिक सुरक्षा सुविधाका कारण नेपाली चालकका लागि जापान राम्रो रोजगारी गन्तव्य बन्न सक्ने कम्पनीको विश्वास छ। नेपाल र जापान दुवै देशमा सडकको बायाँतर्फ सवारी चलाइने भएकाले नेपाली चालकलाई जापानी सडक प्रणालीसँग अभ्यस्त हुन केही सहज हुने अपेक्षा गरिएको छ।
यद्यपि जापानमा व्यावसायिक चालकका रूपमा काम गर्न जापानी भाषा, आवश्यक सीप परीक्षा, ट्राफिक नियम तथा ड्राइभिङ लाइसेन्ससम्बन्धी मापदण्ड पूरा गर्नुपर्ने हुन्छ।
कम्पनीका अनुसार यसअघि पनि उनीहरूमार्फत जापान पुगेका नेपाली ट्रक चालकहरू त्यहाँ सफलतापूर्वक कार्यरत छन्। यही अनुभवलाई आधार बनाएर थप नेपाली चालकलाई जापानमा रोजगारीका लागि पठाउने तयारी गरिएको हो।
पहिलो चरणमा छनोट हुने ८०० जनालाई निःशुल्क जापानी भाषा तथा ड्राइभिङ तालिम दिने योजनाअनुसार चितवन, पोखरा र काठमाडौंमा कार्यक्रम सञ्चालनको तयारी भइरहेको छ।
इच्छुक तथा अनुभवी चालकलाई आफ्नो ड्राइभिङ लाइसेन्स र कार्यअनुभवसम्बन्धी विवरणसहित लाइफलाइन ओभरसिज (CHITWAN) प्रा.लि. वा भिक्ट्री निहोन एजुकेशनल कन्सल्टेन्सीमा सम्पर्क गरी प्रारम्भिक छनोट तथा तालिम प्रक्रियाबारे जानकारी लिन कम्पनीले आग्रह गरेको छ।
प्रस्तावित सुविधा रोजगार सम्झौता र कानुनी प्रक्रियामा निर्भर
कम्पनीले सार्वजनिक गरेको तलब, हवाई टिकट, लाइसेन्स खर्च तथा अन्य सुविधाहरू सम्बन्धित जापानी रोजगारदाता कम्पनीसँग हुने अन्तिम सम्झौता र प्रचलित कानुनी प्रक्रियाअनुसार लागू हुनेछन्। त्यस्तै, निःशुल्क तालिमका लागि छनोट हुँदैमा जापानमा रोजगारी सुनिश्चित हुने छैन। इच्छुक व्यक्तिले आवेदन दिनुअघि रोजगार सम्झौता, लागत, भिसा प्रक्रिया र वैदेशिक रोजगारसम्बन्धी कानुनी प्रावधानबारे स्पष्ट जानकारी लिनुपर्नेछ।
-
१.
-
२.
-
३.
-
४.
-
५.
-
६.
-
७.
-
८.
-
९.
-
१०.